Drejtori për Mbrojtje dhe Shpëtim, Enver Shabani, është pritur nga zv. komandanti i Forcës së Sigurisë së Kosovës në Gjilan, Gëzim Osmani, ku u zhvillua një diskutim i rëndësishëm lidhur me koordinimin dhe bashkëpunimin institucional në fushën e mbrojtjes, sigurisë dhe menaxhimit të emergjencave.
Në takim ishin edhe Salih Mustafa, përgjegjës i Operativës 112 në Gjilan, si dhe Hazir Mustafa, zyrtar për sistemimin e forcave për MSHN-ës nga DMSh-ja.
Takimi kishte për qëllim forcimin e bashkëpunimit ndërmjet institucioneve që kanë rol kyç në menaxhimin e situatave emergjente dhe reagimin ndaj fatkeqësive natyrore apo emergjencave të tjera.
Gjatë takimit u diskutua për rëndësinë e koordinimit të strukturave operative në raste emergjente, planifikimin e aktiviteteve të përbashkëta, si dhe ngritjen e kapaciteteve profesionale dhe teknike për reagim sa më efikas në shërbim të qytetarëve.
Po ashtu, u trajtuan edhe çështje që ndërlidhen me gatishmërinë institucionale, komunikimin operacional dhe bashkërendimin ndërmjet mekanizmave lokalë dhe forcave të sigurisë.
Drejtori për Mbrojtje dhe Shpëtim, theksoi rëndësinë e bashkëpunimit të vazhdueshëm me institucionet e sigurisë dhe mekanizmat emergjentë, duke vlerësuar rolin e FSK-së në ofrimin e mbështetjes në situata të ndryshme emergjente dhe në ruajtjen e sigurisë së qytetarëve.
“Vetëm përmes koordinimit dhe bashkëpunimit të ngushtë institucional mund të arrihet një reagim më i shpejtë dhe më profesional në rast nevoje”, tha Enver Shabani.
Nga ana tjetër, zv. komandanti i FSK-së në Gjilan shprehu gatishmërinë për vazhdimin e bashkëpunimit me DMSh-në, duke theksuar rëndësinë e shkëmbimit të përvojave, organizimit të aktiviteteve të përbashkëta dhe fuqizimit të mekanizmave të reagimit emergjent.
Takimi u vlerësua si shumë konstruktiv dhe në frymën e bashkëpunimit të ndërsjellë, me synim rritjen e efikasitetit institucional dhe avancimin e sigurisë dhe mbrojtjes për qytetarët e Komunës së Gjilanit./Gjilani INFO/
