Drejtoria e Arsimit e Komunës së Gjilanit, ka arritur memorandum bashkëpunimi me Shoqatën Handikos të Kosovës, për realizimin e projektit “Pilotimi i shërbimeve të ndërhyrjes së hershme me qasje në qendër të familjes në pesë Komuna”.
Shpend Nuhiu, drejtor për Arsim, tha se ky projekt ka për qëllim krijimin e një këndi lojërash gjithëpërfshirës në mjediset e jashtme të institucionit parashkollor “Dardania”, që do të shërbejë për të gjithë fëmijët.
“Ky kënd lojërash është një hap i rëndësishëm për integrimin dhe mbështetjen e fëmijëve në vitet e hershme. Komuna e Gjilanit, është e para në realizimin e këtij projekti të rëndësishëm”, tha drejtori Shpend Nuhiu.
Marrëveshja është nënshkruar nga drejtori i Handikos-it, Afrim Maliqi dhe drejtori për Arsim Shpend Nuhiu.
Afrim Maliqi, drejtori i Handikos-it, ka thënë se këtë vit kanë filluar me një formë të re të ofrimit të shërbimeve në terren për fëmijët me vështirësi zhvillimore dhe aftësi të kufizuara, përmes së cilave synojmë mbështetjen e zhvillimit, aftësive dhe socializimit të fëmijëve të moshës 0-6 vjeç.
Përmes qasjes multidisiplinare, në përditshmëri jemi duke ofruar mbështetjes zhvillimore të fëmijëve të vegjël në Komunën e Gjilanit.
Janë rreth 200 familje të identifikuara, të cilat do të përfitojnë nga këto shërbime në pesë komuna.
Sipas tij e veçanta e këtij programi është fuqizimi i familjes, si dhe ofrimi i shërbimeve në ambientet natyrore të fëmijës, siç është shtëpia, këndi i lojërave, apo kopshti.
Projekti mbështetet nga UNICEF dhe nga Dukati i Madh i Luksemburgut, ndërsa zbatohet nga Handikos në bashkëpunim me Drejtorinë Komunale të Arsimit./GJILANI INFO/
