Drejtori i DKA-së në Gjilan, Shpend Nuhiu, mori pjesë si i ftuar në prezantimin e raportit “Indeksi i Sigurisë në Shkolla – Faza e Parë”, të publikuar nga Instituti për Drejtësi, Edukim dhe Avancim (IDEA).
Ky raport bazohet në hulumtime të periudhës 2022–2024 dhe përfshin të dhëna nga MAShTI, Policia e Kosovës, Prokuroria dhe institucione të tjera, duke ofruar një pasqyrë gjithëpërfshirëse mbi gjendjen e sigurisë në shkolla.
Në fjalën e tij, drejtori Nuhiu theksoi se kampuset shkollore në Gjilan ofrojnë kushte infrastrukturore që mundësojnë siguri të avancuar për nxënësit.
Ai mirëpriti rekomandimet për përmirësimin e rregulloreve komunale, bashkëpunimit institucional dhe forcimin e mekanizmave të raportimit, duke ritheksuar përkushtimin e DKA-së për një mjedis të sigurt, të shëndetshëm dhe gjithëpërfshirës për nxënësit dhe stafin arsimor./GJILANI INFO/
