Drejtori për Arsim në Gjilan, Jeton Rexhepi, i cili ndodhet për vizitë zyrtare në Shtetet e Bashkuara të Amerikës, vizitoi Akademinë e Karrierës në Sioux City (Career Academy) në shtetin e Iowas, një institucion i njohur për qasjen moderne në arsimin profesional dhe teknik.
“Gjatë kësaj vizite, pata mundësinë të njihem nga afër me organizimin e akademisë, programet profesionale dhe mënyrën e integrimit të nxënësve në tregun e punës përmes praktikës profesionale dhe bashkëpunimit të ngushtë me bizneset locale”, tha Rexhepi.
Sipas tij në kuadër të kësaj akademie funksionojnë shumë drejtime profesionale, të cilat u ofrojnë nxënësve mundësi konkrete për punësim.
Drejtori për Arsim, u njoftua nga afër me modelin e organizimit të kësaj akademie, me theks të veçantë në ndërlidhjen e arsimit me nevojat reale të tregut të punës dhe në përgatitjen e nxënësve për sfidat e së ardhmes.
“Po ashtu, gjatë vizitës u diskutuam mundësitë e bashkëpunimit dhe të shkëmbimit të përvojave në fushën e arsimit profesional, me synim avancimin e cilësisë së arsimit dhe krijimin e mundësive më të mira për të rinjtë tanë”, tha drejtori Jeton Rexhepi./Gjilani INFO/
