Arbër Ismajli, kandidati i LDK-së për kryetar të Komunës së Gjilanit
Do ta ruajmë, zhvillojmë dhe promovojmë pasurinë tonë ujore për sport, rekreacion dhe jetë më të mirë në Gjilan
Kënaqësi të takohem me përfaqësuesit e Shoqatës së Peshkatarëve Sportiv Rekreativ “Cormoran”, një organizatë e përkushtuar që për vite të tëra ka kontribuar në ruajtjen e mjedisit dhe promovimin e sportit të peshkimit në Gjilan dhe më gjerë.
Kryetari i shoqatës, njëkohësisht sekretar i Federatës së Peshkatarëve Sportiv të Republikës së Kosovës, z. Sadat Gjinolli, më njoftoi për veprimtarinë e tyre, strukturën organizative dhe pjesëmarrjen në gara vendore e ndërkombëtare.
E falënderova për punën e madhe që bëjnë dhe për përkushtimin e vazhdueshëm që e kanë treguar në çdo aktivitet sportiv e rekreativ.
Krenar që gjithmonë kemi qenë afër kësaj shoqate, sidomos në Memorialin “Agim Ramadani”, në përkrahje të hapësirave të tyre punuese dhe pjesëmarrjeve të tyre në gara të rëndësishme.
Rezultatet që kanë arritur nga kampionët e Kosovës deri te pjesëmarrjet në garat evropiane, janë dëshmi e përkushtimit dhe dashurisë për sportin.
Në planin tonë qeverisës, si qeverisje e ardhshme kemi paraparë mbështetje të veçantë për peshkimin sportiv dhe aktivitetet rekreative, duke përfshirë: Integrimin e memorialit “Agim Ramadani” në projektin “Ditët e Agimit”, Aktivizimin e studimit të fizibilitetit për pastrimin dhe zhvillimin e pendës së Livoqit, si zonë rekreative dhe sportive për qytetarët e Gjilanit, Koordinim për ruajtjen e burimeve ujore, përfshirë lumin Morava e Binçës, si dhe mbrojtjen e florës e faunës lokale.
Një nga përkushtimet tona më serioze mbetet ndërtimi i impiantit të ujërave të zeza dhe rrjeti i plotë i kolektorëve fekalë, si pjesë e planit për një ambient më të pastër dhe jetë më cilësore për qytetarët tanë.
Faleminderit nga zemra për mikpritjen dhe bashkëbisedimin e hapur.
Bashkë do ta ruajmë, zhvillojmë dhe promovojmë pasurinë tonë ujore për sport, rekreacion dhe jetë më të mirë në Gjilan.
