Është mbajtur tryeza për të diskutuar rreth sfidave të Ligjit për Përdorimin e Gjuhëve Zyrtare në regjionin e Gjilanit nga Ministria e Administrimit të Pushtetit Lokal në bashkëpunim me Zyrën për Komisionerin për Gjuhe/Zyra e Kryeministrit, Institucionin e Avokatit të Popullit dhe në mbështetje të Këshillit të Evropës.
Nënkryetarja e Komunës së Gjilanit Leonora Morina Bunjaku, duke folur për temën “Nxitja e kohezionit shoqëror përmes fuqizimit të të drejtave të pakicave kombëtare dhe përdorimit të gjuhëve”, tha se Ligji për Përdorimin e Gjuhëve Zyrtare, ka zbatueshmëri deri diku të kënaqur.
Ajo tregoi se Komuna e Gjilanit ka edhe nënkryetarin nga komunitet, derisa po ashtu është funksionale edhe zyra për komunitete.
Sipas saj përdorimi i gjuhëve gjen zbatim, derisa edhe dokumentet e kërkuara lëshohen edhe në gjuhët zyrtare të kërkuara.
Ajo tregoi se edhe dëgjimet buxhetore me pjesëmarrje janë realizuar me komunitete ku dhe ftesat e materialet janë bërë në gjuhët e komuniteteve.
Në këtë takim u diskutua rreth sfidave që hasim gjatë procesit të zbatimit të Ligjit për Përdorimin e Gjuhëve Zyrtare: roli i anëtarëve të rrjetit të politikave gjuhësore, publikimi i dokumenteve në gjuhët zyrtare në web faqet zyrtare të komunave , koeficientet e përkthyesve në komuna , mbishkrimet brenda dhe jashtë institucioneve publike, rrugë , sheshe etj dhe koordinimi i brendshëm dhe çështje tjera./GJILANI INFO/
