Organizata jo-qeveritare Dardanapress, në kuadër të projektit ” Promovimi, Ruajtja dhe Prezantimi i Diversitetit të Trashëgimisë Kulturore”, ka mbajtur konferencën për media në përfundim të realizimit të projektit mbi të arriturat e objektivave dhe rezultatet e projektit .
Në fillim të konferencës projekt menaxheri Sherafedin Vranja njoftoi të pranishmit për qëllimin, objektivat, aktivitetet e realizuara gjatë implementimit të projektit.
Si rekomandime kryesore të dala nga tryeza, punëtoria, debatet dhe trajnimet janë: restaurimi dhe mirëmbajta e monumenteve të trashësisë kulturore, rregullimi dhe përmirësimi i infrastrukturës rrugore, përcaktimi i personave për mirëmbajtjen e monumenteve, shenjëzimi i objekteve të trashëgimisë kulturore, shndërrimi i disa objekteve në bujtina me qëllim të rritjes së vizitorëve, shenjëzimi i shtigjeve dhe emërimi i tyre, ndalja e degradimit të monumenteve të trashëgimisë kulturore, shenjëzimi i objekteve të trashëgimisë kulturore me pllaka, hapja e një muzeu arkeologjik dhe etnografik në qytet, vazhdimi i gërmimeve në Kalanë e Kolinës, vazhdimi i gërmimeve dhe hulumtimeve në kalatë e shumta që gjenden në Komunën e Kamenicës, formimi i një komisioni për regjistrimin e të gjitha objekteve të trashëgimisë kulturore, ndarja e një buxheti të veçantë për blerjen e artefakteve dhe mirëmbajtjen e objekteve të trashëgimisë kulturore historike, caktimi i një hapësire për grumbullimin e artefakteve, organizimi i vizitave të monumenteve të trashëgimisë kulturore, organizmi i orëve mësimore nëpër shkolla për trashëgiminë kulturore, vetëdijësimi i qytetarëve mbi mbrojtjen e monumenteve.
Rekomandimet e dala nga aktivitetet do t’i adresohen Kryetarit të Komunës, Ministrisë së Kulturës, Rinisë dhe Sportit, drejtorive komunale për shqyrtimin dhe realizmin e rekomandimeve.
Në konferencë kanë marrë pjesë: nënkryetarja për komunitete , zyrtarë nga zyra e kryetarit të komunës, zyrtarë nga zyra për Komunikim dhe Marrëdhënie me Publikun, zyrtarë të drejtorive komunale, organizata të shoqërisë civile dhe media.
Ky projekt është financuar nga Ministria e Kulturës, Rinisë dhe Sportit. GJILANI INFO/
