Organizata Joqeveritare Dardanapress, në kuadër të projektit “Promovimi i politikave të zhvillimit socio-ekonomik në Komunën e Kamenicës”, ka mbajtur debatin me temën “Diskutimi lidhur me sfidat dhe zbatimin e Rregulloreve Komunale”.
Qëllimi i organizimit të këtij debati ishte krijimi i një platforme dialogu ndërmjet institucioneve komunale, organizatave të shoqërisë civile dhe akterëve të tjerë relevantë, për të diskutuar kornizën ligjore dhe institucionale që rregullon hartimin, miratimin dhe zbatimin e rregulloreve komunale, si dhe sfidat që paraqiten gjatë zbatimit të tyre në praktikë.
Kryesuesja e Kuvendit Komunal, Arbnore Beqiraj-Fera, theksoi rëndësinë e debatit dhe të bashkëpunimit ndërmjet institucioneve dhe shoqërisë civile në adresimin e sfidave që lidhen me hartimin dhe zbatimin e rregulloreve komunale.
Ajo po ashtu vlerësoi se diskutime të tilla kontribuojnë në rritjen e transparencës, përmirësimin e politikave lokale dhe krijimin e kushteve më të favorshme për zhvillimin socio-ekonomik të Komunës së Kamenicës, duke theksuar se rekomandimet e dala nga debati do të shërbejnë si një udhërrëfyes i rëndësishëm për institucionet komunale në proceset e ardhshme vendimmarrëse.
Ndër rekomandimet kryesore të dala nga debati u veçuan: Zbatimi i Planit Zhvillimor Komunal dhe dokumenteve strategjike të komunës, përmirësimi i infrastrukturës rrugore, aktivizimi i Qendrës së Bizneseve, kufizimi i ndërtimeve me materiale të rënda ndërtimore në zonat rurale, planifikimi dhe destinimi më efikas i tokave me qëllim të rritjes së investimeve, si dhe rivitalizimi i objekteve të vjetra dhe shndërrimi i tyre në objekte me potencial turistik.
Në këtë debat morën pjesë Kryesuesja e Kuvendit Komunal, Arbnore Beqiraj-Fera, Drejtori për Bujqësi, Pylltari dhe Zhvillim Rural, Shpend Morina, Drejtori i Shëndetësisë dhe Mirëqenies Sociale, Besart Kryeziu, përfaqësues nga Drejtoria e Zhvillimit Ekonomik dhe Diasporës, përfaqësues nga Drejtoria për Kulturë, Rini dhe Sport, përfaqësues të Zyrës së Punësimit, përfaqësues nga Zyra Ligjore, anëtarë të Handikos-it, përfaqësues të organizatave të shoqërisë civile, si dhe media lokale.
Projekti “Promovimi i politikave të zhvillimit socio-ekonomik në Komunën e Kamenicës” është financuar nga Ministria e Zhvillimit Rajonal:/Gjilani INFO/
