Drejtoria Rajonale e Policisë në Gjilan ka bërë të ditur se gjatë periudhës 29 maj – 4 qershor 2026, në kuadër të aktiviteteve për rritjen e sigurisë në trafikun rrugor, janë shqiptuar gjithsej 1,567 gjoba kundërvajtëse për shkelje të ndryshme të rregullave të komunikacionit.
Sipas njoftimit të policisë, gjatë kësaj periudhe janë hetuar 32 aksidente trafiku, prej tyre 17 me dëme materiale dhe 15 me persona të lënduar.
Po ashtu, njësitet e trafikut kanë ndërmarrë masa ndaj shkelësve të rregullave të komunikacionit, duke shqiptuar: 21 gjoba për mosvendosje të rripit të sigurisë; 44 gjoba për përdorim të telefonit gjatë vozitjes;
67 gjoba ndaj drejtuesve të motoçikletave për shkelje të ndryshme si dhe
35 masa të ndalimit të drejtimit të mjeteve motorike.
Policia Rajonale e Gjilanit ka apeluar edhe tek përdoruesit e trotinetëve elektrikë që të respektojnë rregullat e trafikut, të lëvizin me shpejtësi të përshtatshme dhe të mos transportojnë pasagjerë.
Sipas policisë, trotinetët elektrikë duhet të drejtohen vetëm nga persona mbi moshën 16-vjeçare, ndërsa kërkohet kujdes maksimal dhe respekt ndaj pjesëmarrësve të tjerë në trafik./Gjilani INFO/
