Presidenti i SHBA-së, Joe Biden shënoi Ditën e Pavarësisë së Ukrainës të mërkurën me 3 miliardë dollarë (3.01 miliardë euro) ndihmë për sigurinë, paketa më e madhe e ndihmës e Uashingtonit që nga pushtimi i Rusisë gjashtë muaj më parë.
Ndihma, e shpallur në Ditën e Pavarësisë së Kievit, vjen pasi zyrtarët amerikanë paralajmërojnë se Rusia duket se po planifikon të nisë sulme të reja në infrastrukturën civile të Ukrainës dhe objektet qeveritare në ditët në vijim.
“Shtetet e Bashkuara të Amerikës janë të përkushtuara për të mbështetur popullin e Ukrainës ndërsa ata vazhdojnë luftën për të mbrojtur sovranitetin e tyre”, tha Biden në një deklaratë duke zbardhur paketën teksa vë në dukje përvjetorin “e hidhur” të pavarësisë së Kievit nga sundimi sovjetik i dominuar nga Rusia 31 vjet më parë.
Ndihma prej rreth 2.98 miliardë dollarësh “do t’i lejojë Ukrainës të blejë sisteme të mbrojtjes ajrore, sisteme artilerie dhe municione, sisteme ajrore kundër pa pilot dhe radarë për të siguruar se mund të vazhdojë të mbrohet për një afat të gjatë”, tha ai.
Në total, Shtetet e Bashkuara kanë dhënë rreth 10.6 miliardë dollarë (rreth 11 miliardë euro) ndihmë sigurie për Ukrainën që nga fillimi i administratës së Bidenit në janar të vitit 2021. Që nga viti 2014, Shtetet e Bashkuara kanë dhënë më shumë se 12.6 miliardë dollarë (13 miliardë euro) ndihmë për sigurinë për Ukrainën.
Paketa e re përdor fondet nga Iniciativa e Ndihmës për Sigurinë e Ukrainës (USAI) të përvetësuara nga Kongresi për të lejuar administratën Biden të prokurojë armë nga industria në vend që të marrë armë nga rezervat ekzistuese të armëve të SHBA.
Që kur forcat ruse pushtuan më 24 shkurt në atë që presidenti Vladimir Putin e quajti një “operacion special ushtarak” për çmilitarizimin e Ukrainës, konflikti është shndërruar në një luftë shkatërrimi të zhvilluar kryesisht në lindje dhe jug të vendit.
