Një vepër humane dhe prekëse u realizua në Komunën e Kamenicës, ku është blerë një autoambulance të re që do të mbajë emrin e Drejtoreshës së ndjerë Greta Kryeziu.
Kryetari i Komunës, Kadri Rahimaj, bëri të ditur se kjo autoambulancë është blerë me mjetet që ishin mbledhur për trajtimin e Drejtoreshës së Shëndetësisë Greta, e cila fatkeqësisht humbi betejën me sëmundjen e saj.
“Dashuria e njerëzve për Gretën nuk u shua por u shndërrua në vepër që do të shërbejë për jetën. Kjo autoambulancë do të mbajë përjetësisht emrin Greta Kryeziu, vajzës së mirë, profesionistes së përkushtuar dhe shpirtit të pastër që la gjurmë në zemrat tona. Iniciativa u realizua në marrëveshje me familjen e saj dhe me ndihmën e mikut të komunës, Vehap Zuka, i cili kishte udhëhequr fushatën humanitare për ndihmën ndaj Gretës. Autoambulanca e re do t’u shërbejë banorëve të Roganës, Hodonocit, Muçivërcit, Shipashnicës, Karaqevës dhe gjithë rrethinës, duke përmirësuar qasjen në shërbimet emergjente shëndetësore” ka thënë Kryetari Rahimaj.
Ndër të tjera Kryetari Rahimaj në emër të komunës, shprehu falënderime të thella për të gjithë qytetarët, miqtë dhe donatorët që kontribuan me shpirt e dashuri për ta bërë të mundur këtë nismë.
“Faleminderit nga zemra të gjithë bashkëqytetarëve, miqve dhe njerëzve të mirë që kontribuan me shpirt e dashuri për ta bërë të mundur këtë vepër humane. Mbi të gjitha, faleminderit përzemërsisht familjes së drejtoreshës Greta, që tregoi bujari dhe korrektësi ndaj donatorëve. Z. Basri, keni nderuar familjen dhe qytetin me këtë veprim”, ka thënë Kryetari Rahimaj./GJILANI INFO/
