Kryetari i Komunës së Gjilanit, Alban Hyseni ka thënë se Asociacioni i Komunave të Kosovës duhet të jetë zëri i të gjitha 38 komunave, jo një mekanizëm për përplasje politike me Qeverinë.
“Faktet flasin qartë: nga 546 milionë euro buxhet për komunat në vitin 2021, në vitin 2027 ky buxhet pritet të arrijë në 907 milionë euro. Pra, një rritje prej rreth 66%”, ka thënë Hyseni.
I pari i Gjilnait tha se mjetet për komunat nuk janë zhdukur dhe as nuk janë “marrë” nga Qeveria, siç pretendohet nga Drejtori Ekzekutiv i Asociacionit, Sazan Ibrahimi. Ato kthehen sërish te komunat përmes projekteve dhe investimeve që ndikojnë drejtpërdrejt në jetën e qytetarëve.
“Nëse flasim për dëmet financiare të komunave, atëherë duhet të flasim edhe për pasojat e kontratës kolektive të nënshkruar gjatë qeverive Mustafa dhe Haradinaj. Për këtë, zëri i Asociacionit ka munguar” thotë tutje Hyseni.
Sipas tij, nëse Asociacioni është zëri i komunave, atëherë duhet të jetë zëri i të gjitha komunave. Jo zë selektiv. Jo presion politik. Jo protesta të instrumentalizuara.
“Komunat kanë nevojë për bashkëpunim institucional, jo për përplasje politike. Kosova ka nevojë për punë, investime dhe rezultate”, ka thënë Alban Hyseni, kryetar i Komunës së Gjilanit./Gjilani INFO/
