Prokuroria Speciale e Kosovës ka bërë kërkesë pranë Gjykatës Themelore në Prishtinë, Departamenti Special, për caktimin e paraburgimit ndaj të pandehurit me inicialet Z.A, i nacionalitetit serb, i cili është ndaluar gjatë të martës me dyshimet për krime lufte kundër popullatës civile.
Në pyetjen e bërë nga Telegrafi, lidhur me masën ndaj të dyshuarit për krime lufte, zëdhënësi i Prokurorisë Speciale, Ekrem Lutfiu tha se është kërkuar paraburgim për të dyshuarin.
“Ju njoftoj se Prokuroria Speciale e Republikës së Kosovës ka bërë kërkesë pranë Gjykatës Themelore në Prishtinë, Departamenti Special, për caktimin e paraburgimit ndaj të pandehurit me inicialet Z.A., nacionalitetit serb, i cili është ndaluar gjatë ditës së djeshme, me dyshimet se ka kryer veprën penale ‘Krime lufte kundër popullatës civile’ nga neni 142 lidhur me nenin 22 të LP të RSFJ-së”, tha ai.
Prokuroria Speciale të martën kishte njoftuar se serbi i arrestuar dyshohet se kishte torturuar për një ore e gjysmë një person në vitin 1999 në Kamenicë.
“Po ashtu, ekziston dyshimi i arsyeshëm se i pandehuri Z.A., gjatë periudhës së luftës në Kosovë, konkretisht në periudhën shkurt-mars 1999, në bashkëkryerje me pjesëtarë të tjerë të policisë serbe dhe grupeve paramilitare ka marrë pjesë në dëbimin dhe shpërnguljen me dhunë të qytetarëve të Kamenicës me rrethinë”.
Sipas njoftimit të Prokurorisë Speciale ai pastaj ka filluar të bëjë plaçkitjen e shtëpive, e më pas me qëllim të dëmtimit të pronës së shqiptarëve, ia ka vënë zjarrin, si dhe ka marr pjesë në keqtrajtimin e civilëve shqiptarë.
Me këto veprime i pandehuri Z.A., kishte për të kryer veprën penale “Krime lufte kundër popullatës civile” nga neni 142 lidhur me nenin 22 të LP të RSFJ-së.
