Nënkryetari i Lidhjes Demokratike të Kosovës (LDK), Dega në Gjilan, njëherit edhe kandidat për kryetar të Komunës së Gjilanit, në zgjedhjet lokale të tetorit, Arbër Ismajli ka thënë se është për t’u habitur se si qeverisja aktuale e Gjilanit del e krekoset me projekte milionëshe në letra, ndërkohë që realiteti është krejt tjetër.
Ismajli ka thënë: “Nuk është e ndershme të dezinformohen qytetarët, sepse ata janë vëzhguesit më të mirë të punëve tuaja. Asnjë projekt nuk ka përfunduar. Disa janë hapur vetëm në prag fushate, ndërsa shumë të tjera janë projekte të nisura nga koha jonë, të cilat kjo qeveri i ka mbajtur peng tash e mbi tre vjet e gjysmë”
Sipas tij, thuhet se edhe ato që kanë filluar, kanë nisur keq dhe pa plan, në kundërshtim me PZHK-në, e madje disa edhe me uzurpime.
Ndërkaq, viti i ri shkollor është në prag e gjendja nëpër shkolla është alarmante. Ismajli thotë se to janë katandisur në kushte të mjerueshme, ku nxënësit dhe mësimdhënësit do të përballen me mungesën e gjërave më elementare.
Ai ka thënë se nuk ka kontrata as për shkumësa, e as për ngjyra të fotokopjuesve. Mësimdhënësit do të detyrohen të mbledhin para nga xhepi i tyre për të bërë kopje jashtë shkollës. Drejtorët po japin vërtetime me dorë sepse nuk ka ngjyra. Nuk ka as furnizim me pajisje sportive për fëmijët tanë.
“Në anën tjetër, punimet e nisura pa planifikim nëpër qytet po shndërrohen në barrë të përditshme për qytetarët, bizneset dhe ekonomitë familjare. Veturat dhe mjetet tjera motorike pësojnë prishje të vazhdueshme, shtëpitë po mbulohen nga pluhuri, ndërsa shëndeti i qytetarëve po rrezikohet nga kaosi dhe rrëmuja”, thuhet nga Arbër Ismajli.
E, sipas tij, ky është treguesi më i qartë se, kur mungon planifikimi dhe përkujdesja, dëmtohet çdo hallkë e jetës sonë të përditshme
“Ky është realiteti i pikëllueshëm ku e ka sjellë qytetin qeverisja aktuale, një pushtet që jeton me propagandë, ndërsa qytetarët jetojnë me mungesë, varfëri dhe dështime të njëpasnjëshme”, ka thënë Arbër Ismajli, i cili në zgjedhjet e 12 tetorit synon për arritur postin e kryetarit të komunës, si kandidat i LDK-së. /GJILANI INFO/
