Nënkryetari i Lidhjes Demokratike të Kosovës, Dega në Gjilan, Arbër Ismajli, njëherit edhe kandidat për kryetar të komunës në zgjedhjet lokale të 12 tetorit është takuar me kryesinë e nëndegës së Lagjes së Vishnjeve dhe banorët e atyshëm.
“Bashkëbiseduam për të mirat publike që mund t’i bëjmë për këtë lagje dhe mënyrat se si mund ta përmirësojmë jetën e përditshme të këtyre banorëve të cilët janë haruuar nga qeverisja lokale”, ka thënë Ismajli.
Ai ka thënë se kjo lagje, e sheh të ardhmen më ndryshe, me më shumë punë dhe më shumë angazhim nga ana e komunës për t’i zgjidhur problemet dhe hallet e tyre.
“Ky takim, më konfirmoi edhe më shumë motivin për të qenë në shërbim të qytetarëve, sepse, marrja e përgjegjësisë dhe shpërblimi me mos punë, nuk do të përkojë asnjëherë me karakterin tonë të ri qeverisës”, ka thënë ai.
Sipas tij, mobilizimi dhe përkushtimi i kësaj kryesie për zgjedhjet e 12 tetorit tanimë ka marrë përmasa tek banorët e kësaj lagje.
Ndërkaq, ka faleminderuar dhe është shprehur shumë mirënjohës për përkushtimin e kryesisë së kësaj nëndege.
“Jemi bashkë në këtë rrugëtim deri në realizimin e synimit tonë të përbashkët për një qeverisje më të drejtë, më humane, dhe e cila është e gatshme t’i realizoj kërkesat dhe nevojat e qytetarëve tanë”, ka përfunduar Arbër Ismajli./GJILANI INFO/
