Spitali i Përgjithshëm i Gjilanit ka mirëpritur sot Ambasadoren e Shtetit të Izraelit në Republikën e Kosovës, znj. Tamar Ziv.
Gjatë vizitës, Drejtori i Spitalit të Përgjithshëm të Gjilanit, Dr. Afrim Cana, i uroi mirëseardhje Ambasadores Ziv dhe e falënderoi për vizitën, si dhe për interesimin e treguar ndaj institucionit dhe pacientëve.
Në fokus të takimit ishte mundësia e krijimit të një salle lojërash të dedikuar për fëmijët e shtruar në spital, me qëllim ofrimin e një ambienti më të ngrohtë, miqësor dhe të përshtatshëm për ta gjatë periudhës së trajtimit.
Sipas Spitalit të Përgjithshëm të Gjilanit, kjo iniciativë synon të ndikojë në përmirësimin e mirëqenies së fëmijëve dhe në krijimin e një përvoje sa më të lehtë gjatë qëndrimit të tyre në spital.
Përfaqësuesit e spitalit kanë vlerësuar interesimin dhe gatishmërinë për të mbështetur iniciativa që kanë ndikim të drejtpërdrejtë në mirëqenien e pacientëve të vegjël.
Vizita u vlerësua si një mundësi për të diskutuar bashkëpunime dhe iniciativa të reja në funksion të përmirësimit të kushteve për fëmijët që marrin trajtim në Spitalin e Përgjithshëm të Gjilanit./Gjilani INFO/
