Sarë Gjergji
(Dashuria është dhuratë hyjnore – flijim për tjetrin!
Agim Ramadani e kishte dashurinë hyjnore, ndaj dhe u flijua për ne…)
Nuk është thjesht vetëm një emër në trajtën e shquar
As vetëm një rreze drite
As vetëm një ditë.
Është dhe një lot i prushtë
që rrëshqet qerpikëve
mbi trupin e ftohtë.
Agimi
është më shumë se Maj
më shumë se lule shumëngjyrëshe, gjethe e fruta stinësh.
Është shikimi
drita e diellit që s’perëndon
fjala në fillim e thënë e besa e dhënë.
Është arti i fjalës, i ngjyrës, i gjakut
frymëmarrje e vetme në çaste agonie
sot, nesër, e përmotshme është.
Pluhurin e heq
nga shkretëtira e kujtesës sonë
e nuk lë asgjë jashtë Arbdheut.
Agimi
fron është./GJILANI INFO/
