Federata e Futbollit e Kosovës së bashku me sponsorin e Superligës, Bankën Kombëtare Tregtare, BKT, vazhdojnë ndarjen e çmimit “YLLI I JAVËS”, për lojtarin më të mirë të xhiros.
“Ylli i javës” për xhiron e 31-të në BKT Superligën e Kosovës është shpallur futbollisti i Ballkanit, Ermal Krasniqi.
Ai ishte shpallur më i miri edhe në xhiron e dytë dhe në xhiron e 11-të.
Krasniqi ishte ndër lojtarët më të mirë të këtij edicioni dhe një paraqitje mbresëlënëse e pati edhe në ndeshjen e javës së 31-të në fitoren 3-2 kundër Dritës.
Ai ishte kreator i golit të parë si dhe shënues i golit të tretë, në minutat shtesë, duke qenë përcaktues në arkëtimin e tre pikëve të reja, të cilat e kanë afruar Ballkanin te titulli i parë i kampionit.
Çmimin “Ylli i javës” për sulmuesin e Ballkanit e ndau Artan Cecelia, menaxher i departamentit në BKT.
