Një kërkesë për paraburgim për tentim-vjedhje të rëndë, ndërsa aktakuzat përfshijnë vepra nga kanosja dhe dhuna në familje deri te posedimi i narkotikëve dhe armëve.
Prokuroria Themelore në Gjilan ka njoftuar për veprimet e fundit të ndërmarra nga prokurorët, ku janë ndaluar dy persona, është kërkuar një masë paraburgimi dhe janë ngritur gjithsej 13 aktakuza ndaj 14 personave për vepra të ndryshme penale.
Sipas njoftimit zyrtar, me urdhër të prokurorit janë ndaluar dy persona për 48 orë, nën dyshimin për kryerjen e veprës penale “Lëndim i lehtë trupor”.
Ndërkohë, Departamenti i Përgjithshëm ka paraqitur një kërkesë në gjykatë për caktimin e masës së paraburgimit ndaj një personi të dyshuar për veprën penale “Vjedhje e rëndë në tentativë”.
Sa u përket aktakuzave, Prokuroria ka ngritur 13 aktakuza kundër 14 personave, për një sërë veprash penale. Një aktakuzë është ngritur për kanosje, një për mbajtje në pronësi, kontroll ose posedim të paautorizuar të armëve, ndërsa një tjetër për lëndim të lehtë trupor.
Po ashtu, janë ngritur katër aktakuza për posedim të paautorizuar të narkotikëve, substancave psikotrope ose analoge, një aktakuzë për vjedhje, dy për vjedhje të pyllit dhe dy për dhunë në familje.
Në një rast tjetër, një aktakuzë është ngritur ndaj dy personave, të cilët ngarkohen për veprat penale “Kanosja” dhe “Sulmi”.
Prokuroria Themelore në Gjilan ka bërë të ditur se do të vazhdojë trajtimin e rasteve penale në përputhje me kompetencat ligjore dhe në bashkëpunim me institucionet e drejtësisë./Gjilani INFO/
