Një person është ndaluar nga Policia e Kosovës dhe Prokuroria Themelore në Gjilan, pasi dyshohet se ka tentuar të kryejë një grabitje në një argjendari në qendër të qytetit.
Sipas njoftimit të Prokurorisë Themelore në Gjilan, rreth orës 14:00 është ndaluar i dyshuari me inicialet D.B., ndaj të cilit ekziston dyshimi se ka kryer veprën penale “Tentim grabitje”, të paraparë me nenin 317 të Kodit Penal të Republikës së Kosovës.
Autoritetet bëjnë të ditur se, menjëherë pas pranimit të informacioneve të para, Policia ka reaguar me shpejtësi dhe, në koordinim me prokurorin e shtetit, ka ndaluar të dyshuarin për 48 orë.
Prokuroria ka nisur hetimet lidhur me rastin dhe ka bërë të ditur se, brenda afateve ligjore, do të paraqesë në Gjykatën Themelore në Gjilan kërkesën për caktimin e masës së sigurisë ndaj të dyshuarit.
Hetimet për rastin janë në vazhdim./Gjilani lNFO/
