Drejtoria Rajonale e Policisë në Gjilan, përkatësisht Stacioni Policor në Kamenicë, ka zhvilluar një takim me inspektorët komunalë dhe pronarët e bizneseve të gastronomisë, restoranteve dhe kafiterive, në kuadër të Planit Operativ “Sezoni Veror 2026”.
Takimi u udhëhoq nga komandanti i Stacionit Policor në Kamenicë, kapiteni Basri Shkodra, së bashku me stafin e tij. Gjatë diskutimit u trajtuan çështjet që lidhen me organizimin e ahengjeve, dasmave dhe aktiviteteve të tjera, duke pasur parasysh fluksin e bashkatdhetarëve që pritet të qëndrojnë në komunë gjatë muajve të verës.
Kapiteni Shkodra theksoi se qëllimi i takimit është krijimi i një ambienti të qetë dhe të sigurt për të gjithë qytetarët, përmes bashkëpunimit ndërmjet Policisë, institucioneve komunale dhe bizneseve, si dhe respektimit të rendit publik dhe legjislacionit në fuqi.
Pjesëmarrësit shprehën gatishmërinë për bashkëpunim me Policinë e Kosovës dhe Inspektoratin Komunal, duke u zotuar për respektimin e të gjitha pikave të dakorduara gjatë takimit.
Policia e Kosovës ka ritheksuar se, në bashkëpunim me partnerët institucionalë, mbetet e përkushtuar për garantimin e rendit, qetësisë dhe sigurisë gjatë sezonit veror në Komunën e Kamenicës./Gjilani INFO/
