Shkruan: Heset Zymberi
Kjo është një pyetje që secili prej nesh duhet t’ia bëjë vetes. Edukata nuk matet me diplomat që posedojmë, as me pozitën që mbajmë në shoqëri. Ajo matet me sjelljen tonë të përditshme, me respektin ndaj tjetrit dhe me përgjegjësinë që tregojmë ndaj hapësirës publike.
Fatkeqësisht, shpesh jemi dëshmitarë të skenave që tregojnë se ende kemi shumë për të mësuar. Hedhja e mbeturinave në rrugë, dëmtimi i pronës publike, parkimi i automjeteve në trotuare, mosrespektimi i rregullave të komunikacionit, zhurmat e panevojshme dhe mungesa e kulturës së dialogut janë dukuri që hasen çdo ditë.
Edukata qytetare nuk është përgjegjësi vetëm e shkollës. Ajo fillon në familje, forcohet në institucionet arsimore dhe reflektohet në çdo hap të jetës sonë. Një shoqëri nuk ndërtohet vetëm me ligje, por edhe me vetëdije dhe respekt të ndërsjellë.
Nëse duam qytete më të pastra, rrugë më të sigurta dhe një jetë më cilësore, ndryshimi duhet të nisë nga secili prej nesh. Nuk mjafton të kritikojmë të tjerët; duhet të japim shembull me veprimet tona.
Kosova ka nevojë për qytetarë që respektojnë rregullat, kujdesen për mjedisin, tregojnë mirësjellje dhe kontribuojnë në të mirën e përbashkët. Edukata është pasqyra e një kombi, ndërsa niveli i saj tregon se sa të gatshëm jemi të ndërtojmë një shoqëri moderne dhe të përgjegjshme.
Në fund, pyetja mbetet e hapur: a kemi edukatë të mjaftueshme, apo është koha që secili ta fillojë ndryshimin nga vetja?/Gjilani INFO/
