Një person i dyshuar ka sulmuar një zyrtar policor në Stacionin Policor në Kamenicë, derisa po përgatitej të dërgohej për trajtim në Klinikën e Psikiatrisë në Gjilan.
Sipas raportit të Policisë së Kosovës, ngjarja ka ndodhur më 4 korrik 2026, rreth orës 15:00. I dyshuari, i cili ndodhej në qendrën e paraburgimit, kishte marrë ndihmë mjekësore për shkak të gjendjes së rënduar psikike, ndërsa mjekët kishin lëshuar raport për transferimin e tij në Klinikën Psikiatrike në Gjilan.
Megjithatë, gjatë nxjerrjes nga qendra e paraburgimit dhe vendosjes së prangave, i dyshuari ka rezistuar dhe ka sulmuar një zyrtar policor.
Si pasojë e sulmit, polici ka pësuar lëndime dhe i është ofruar ndihma e nevojshme mjekësore.
Lidhur me rastin, në konsultim me prokurorin e shtetit, është iniciuar procedurë penale për veprën “Sulm ndaj personit zyrtar”, ndërsa organet kompetente janë duke ndërmarrë veprimet e mëtejshme hetimore./Gjilani INFO/
