Kryetari i Komunës së Vitisë, Sokol Haliti, ka bërë të ditur se po vazhdojnë punimet infrastrukturore në fshatin Kabash. Aktualisht, po realizohet pastrimi dhe rivitalizimi i kanaleve kulluese dhe përroskave, si dhe rregullimi i rrugëve nëpër lagje.
Sipas kryetarit Haliti, këto ndërhyrje kanë për qëllim përmirësimin e infrastrukturës lokale, funksionalizimin e rrjetit të kullimit të ujërave sipërfaqësore, si dhe krijimin e kushteve më të mira për qarkullim dhe jetesë të banorëve.
“Punimet po realizohen në kuadër të planit të rregullt të Komunës së Vitisë për mirëmbajtjen dhe zhvillimin e infrastrukturës në të gjitha vendbanimet, duke iu përgjigjur nevojave të qytetarëve”, ka deklaruar kryetari Sokol Haliti.
Ai ka theksuar se Komuna e Vitisë do të vazhdojë me investime të tilla edhe në lokalitetet e tjera, me synim përmirësimin e infrastrukturës dhe rritjen e cilësisë së jetës së qytetarëve./Gjilani INFO/
