Një grup nxënësish të klasave të nënta të Shkollës Fillore të Mesme të Ulët “Thimi Mitko” në Gjilan, të shoqëruar nga mësimdhënësit dhe drejtoresha Ardhmerie Jakupi Musliu, kanë realizuar një vizitë studimore në Liqenin e Ujmanit.
Ky aktivitet u organizua me synimin që nxënësit të njihen më nga afër me vlerat natyrore, turistike dhe ekonomike të njërit prej resurseve më të rëndësishme ujore në Kosovë. Vizita u shndërrua në një mundësi të mirë për të kombinuar mësimin praktik me përvojën në terren.
Sipas drejtoreshës Ardhmerie Jakupi Musliu, për një numër të konsiderueshëm të nxënësve kjo ishte vizita e parë në Ujman, gjë që e bëri përvojën edhe më të veçantë dhe mbresëlënëse.
“Përveç bukurive natyrore që ofron kjo zonë, nxënësit patën rastin të mësojnë më shumë për rëndësinë e liqenit dhe rolin e tij në jetën ekonomike dhe shoqërore të vendit”, ka thënë ajo.
Nga drejtoria e shkollës u vlerësua se aktivitete të tilla jashtë ambienteve mësimore kontribuojnë në zgjerimin e njohurive të nxënësve, nxisin kureshtjen për mjedisin dhe forcojnë lidhjen e tyre me pasuritë natyrore të Kosovës./Gjilani INFO/
