Drejtori i Drejtorisë për Mbrojtje dhe Shpëtim në Komunën e Gjilanit, Enver Shabani, ka marrë pjesë në punëtorinë “Përmirësimi i të kuptuarit të rrezikut nga fatkeqësitë, parashikimi i bazuar në ndikim dhe paralajmërimi i hershëm”, të organizuar nga Agjencia e Menaxhimit të Emergjencave në bashkëpunim me Bankën Botërore.
Aktiviteti u zhvillua në kuadër të projektit për Parandalimin dhe Përgatitjen ndaj Fatkeqësive (TAFF), me synim forcimin e kapaciteteve institucionale për identifikimin, vlerësimin dhe menaxhimin e rreziqeve që vijnë nga fatkeqësitë natyrore.
Sipas Shabanit, gjatë punëtorisë u trajtuan çështje që lidhen me analizimin e rreziqeve, përdorimin e të dhënave meteorologjike dhe hidrologjike për parashikimin e ngjarjeve të mundshme, si dhe avancimin e sistemeve të paralajmërimit të hershëm për reagim më të shpejtë dhe më të koordinuar në raste emergjente.
Punëtoria shërbeu gjithashtu si një mundësi për shkëmbimin e përvojave ndërmjet institucioneve qendrore dhe lokale, duke forcuar bashkëpunimin në fushën e menaxhimit të emergjencave.
Shabani theksoi se pjesëmarrja në këtë aktivitet kontribuon në ngritjen e kapaciteteve profesionale të Drejtorisë për Mbrojtje dhe Shpëtim, përmirësimin e planifikimit dhe koordinimit ndërinstitucional, si dhe rritjen e gatishmërisë për mbrojtjen e jetës, pronës dhe mjedisit në raste fatkeqësish natyrore dhe emergjencash të tjera./Gjilani INFO/
