Pas një karriere të gjatë dhe të suksesshme në fushën e arsimit, edukatorja Zijavere Rukovci ka përmbyllur rrugëtimin e saj profesional, duke u pensionuar pas dekadash të tëra pune dhe përkushtimi në edukimin e brezave të rinj.
Me këtë rast, kolektivi i SHFMU “Selami Hallaçi” në Gjilan ka shprehur mirënjohje dhe respekt të veçantë për kontributin e saj shumëvjeçar në procesin edukativo-arsimor.
Në njoftimin e shkollës thuhet se Zijavere Rukovci ishte një figurë e respektuar, e cila për vite me radhë edukoi dhe frymëzoi gjenerata të shumta nxënësish, duke lënë gjurmë të pashlyeshme në jetën e tyre dhe në komunitetin shkollor.
“Prania e saj do të mungojë në bankat dhe ambientet e shkollës, por vlerat, përkushtimi dhe shembulli që la pas do të mbeten frymëzim për kolegët dhe nxënësit”, thuhet në njoftim.
Në shenjë falënderimi për angazhimin e saj të palodhshëm, kolektivi i shkollës i uroi edukatores Rukovci shëndet, lumturi dhe qetësi në kapitullin e ri të jetës, duke vlerësuar lart kontributin e saj në edukimin dhe formimin e shumë brezave.
Kontributi i Zijavere Rukovcit do të mbetet pjesë e historisë dhe traditës së SHFMU “Selami Hallaçi”, si shembull i përkushtimit dhe dashurisë ndaj profesionit të edukatores./Gjilani INFO/
