Prokuroria Themelore në Gjilan ka njoftuar për një ndalim dhe disa aktakuza të reja lidhur me raste të ndryshme penale.
Sipas njoftimit, më 30 prill 2026, me urdhër të prokurorit kujdestar, është ndaluar një (1) person i dyshuar për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, sipas nenit 267 të Kodit Penal të Kosovës.
Ndërkohë, më 29 prill 2026, Prokuroria ka ngritur gjashtë (6) aktakuza kundër tetë (8) personave për vepra të ndryshme penale.
Tri (3) aktakuza janë ngritur kundër katër (4) personave për veprën penale “Lëndimi i lehtë trupor”.
Një (1) aktakuzë është ngritur kundër dy (2) personave për veprën penale “Shmangia nga tatimi”.
Po ashtu, nga një (1) aktakuzë është ngritur për veprat penale “Dhuna në familje” dhe “Vjedhja e pyllit”, secila kundër nga një (1) personi.
Prokuroria nuk ka dhënë detaje shtesë për rastet, ndërsa procedurat penale pritet të vazhdojnë në institucionet përkatëse gjyqësore./Gjilani INFO/
