Në Viti, sot është shënuar Dita e Shkollës në Gjimnazin “Kuvendi i Lezhës”, njëkohësisht edhe 53-vjetori i pavarësimit të këtij institucioni arsimor, përvjetor ky që lidhet me vitin shkollor 1972–1973, kur gjimnazi u nda nga Gjimnazi “Zenel Hajdini” në Gjilan.
Manifestimi u mbajt në praninë e përfaqësuesve të institucioneve komunale, veteranëve të arsimit, personaliteteve nga jeta publike dhe institucionale, profesorëve, nxënësve dhe qytetarëve të shumtë.
Me këtë rast, kryetari i komunës së Vitisë, Sokol Haliti, në fjalën e tij theksoi rëndësinë e kësaj dite për komunitetin dhe arsimin në përgjithësi.
Ai u shpreh se është nder i veçantë që, në emër të institucioneve komunale dhe qytetarëve, të urojë këtë përvjetor që lidhet simbolikisht edhe me Besëlidhja e Lezhës, një moment kyç në historinë shqiptare që shënon bashkimin politik të trojeve shqiptare.
Haliti vuri theks të veçantë edhe te përurimi i projektit për renovimin dhe modernizimin e plotë të objektit të gjimnazit.
“Ky përvjetor merr peshë të veçantë sepse shënon përurimin e investimeve të rëndësishme në renovimin dhe modernizimin e këtij institucioni, falë mbështetjes konkrete të Bashkimit Evropian,” u shpreh ai.
Ai falënderoi Bashkimi Evropian për këtë investim domethënës në sektorin e arsimit, si dhe Zyrën Ndërlidhëse të BE-së në Kosovë, përfaqësuar nga Hubert Perr, dhe koordinatoren e projektit, Besime Kajtazi, për profesionalizmin dhe bashkëpunimin institucional në realizimin e projektit.
Sipas tij, ky projekt ka krijuar kushte dukshëm më të mira për nxënësit dhe personelin arsimor, duke ndikuar drejtpërdrejt në rritjen e cilësisë në arsim.
Në fund, kryetari Haliti theksoi se përmirësimi i cilësisë në arsim mbetet një nga prioritetet kryesore të qeverisjes komunale, me fokus të veçantë në investime që sigurojnë ambiente sa më të përshtatshme për zhvillimin dhe edukimin e brezave të rinj.
Një fjalë rasti e mbajti edhe drejtori i Zyrës evropiane në Kosovë Hubert Perr, I cili tha se është ky një rast i mirë sot, që të kemi një objekt të renovuar në ditën e shënimit të shkollës.
Është me rëndësi të kemi ambiente të mira për të mësuar dhe kjo është arsyeja pse BE ka investuar mbi 1 milion euro për renovim e kësaj shkolle. Për historikun e shkollës, foli drejtori i Gjimnazit “Kuvendi Lezhës” Mujë Tafa, i cili mes tjerash edhe përmendi të arriturat e saj ndër vite.
Gjithashtu në fund, u zbulua edhe pllaka memorialë me emrin e Selim Musliu-Pavaresuesit të Gjimnazit, ish drejtorit të parë të kësaj shkolle, që kur u pavarësua në vitin 1072-73./Gjilani INFO/
