Universiteti Publik “Kadri Zeka” nga Gjilani, është nderuar me Çmimin e Partneritetit (Best Partnership Award) nga Komisioni i Vlerësimit të Kontributeve Akademike, i përbërë nga 23 studiues nga Shqipëria, Kosova, Maqedonia e Veriut, Mali i Zi dhe Diaspora.
Çmimi Universitetit Publik “Kadri Zeka”, iu dha për bashkëpunimin e suksesshëm dhe veçanërisht, për organizimin e konferencës ndërkombëtare dhe ndërdisiplinore “Roli i teknologjisë në formësimin e shoqërisë bashkëkohore”, mbajtur më 2 dhe 3 qershor të këtij viti.
Ceremonia e dorëzimit të çmimeve u zhvillua gjatë Konferencës Vjetore Ndërkombëtare e Ndërdisiplinore, e cila u mbajt në Universitetin e Shkodrës “Luigj Gurakuqi”.
Në fjalimin e tij gjatë ceremonisë, rektori i Universitetit Publik “Kadri Zeka”, Prof. Asoc. Dr. Artan Dermaku, theksoi rëndësinë e bashkëpunimit rajonal dhe gjithëshqiptar në fushën e shkencës dhe teknologjisë.
“Ky vlerësim për ne ka rëndësi të posaçme, sepse përfaqëson jo vetëm kontributin tonë në organizimin e konferencës së kaluar, por edhe angazhimin e UKZ-së në rrugën e inovacionit, kërkimit shkencor dhe integrimit të teknologjisë moderne në shërbim të zhvillimit shoqëror. Vetëm përmes shkëmbimit të përvojave, projekteve të përbashkëta dhe mobilitetit akademik, universitetet tona mund të rrisin ndikimin e tyre në zhvillimet e kohës dhe të kontribuojnë në mënyrë të drejtpërdrejtë në përparimin shoqëror”, ka thënë Rektori Dërmaku në falën e tij.
Rektori Prof. Asoc. Dr. Artan Dermaku u shpreh gjithashtu se Universiteti Publik “Kadri Zeka” do të vazhdojë të investojë në kërkim shkencor, në teknologji, në inteligjencën artificiale dhe në forcimin e bashkëpunimeve ndëruniversitare në gjithë hapësirën shqiptare, sepse UKZ besonë fuqishëm se një ekosistem i bashkuar shkencor do të kontribuojë në zhvillime të qëndrueshme dhe në ngritjen e kapaciteteve akademike e profesionale të brezave të rinj.
Ndryshe, ky edicion jubilar i konferencës në organizim të përbashkët mes UKZ-së dhe UNISHK, rikthehet në Shkodër pas një tradite 20-vjeçare bashkëpunimi ndërmjet Shqipërisë, Kosovës dhe Maqedonisë së Veriut, duke mbledhur studiues, pedagogë dhe përfaqësues institucionalë nga 26 vende të botës dhe duke krijuar një atmosferë të gjallë shkencore dhe bashkëpunuese./Gjilani INFO/
