Panairi Studentor 2025 u mbajt në Prishtinë, duke sjellë bashkë studentë, universitete dhe përfaqësues të sektorit privat në një ngjarje që promovoi inovacionin, kreativitetin dhe bashkëpunimin ndërinstitucional.
Ngjarja u organizua nga Oda Ekonomike e Kosovës, në bashkëpunim me universitetet e vendit dhe Komunën e Prishtinës, me qëllim krijimin e një platforme ku studentët patën mundësinë të prezantojnë projektet, idetë dhe arritjet e tyre akademike përpara përfaqësuesve të bizneseve dhe institucioneve.
Në këtë panair morën pjesë edhe stafi dhe studentët e Universitetit Publik “Kadri Zeka”, të cilët u dalluan me prezantimin e projekteve të tyre inovative, që reflektojnë kreativitetin, aftësitë teknologjike dhe vizionin e gjeneratës së re.
Panairi ofroi hapësira prezantuese, aktivitete informuese dhe mundësi rrjetëzimi, duke ndërtuar ura të reja bashkëpunimi ndërmjet akademisë dhe sektorit privat. Përmes këtyre ndërveprimeve, studentët patën mundësinë të lidhen me kompani, organizata dhe institucione që ofrojnë mbështetje për zhvillimin profesional dhe punësimin e të rinjve.
Ngjarja dëshmoi se energjia, kreativiteti dhe vizioni i studentëve janë forca që mund të nxisin zhvillimin ekonomik dhe inovacionin në Kosovë.
Panairi Studentor 2025 konfirmoi edhe njëherë rëndësinë e bashkëpunimit ndërmjet universiteteve, institucioneve publike dhe sektorit privat, duke krijuar një terren të favorshëm për ide të reja dhe zgjidhje praktike që kontribuojnë në të ardhmen e vendit./GJILANI INFO/
