Në Fakultetin Juridik të Universitetit Publik “Kadri Zeka” në Gjilan, përfundoi me sukses Klinika Ligjore mbi Azilin, Refugjatët dhe Pashtetësinë, që u mbajt nga 18 mars deri më 29 prill 2025.
Ky program u realizua me mbështetje nga Bashkimi Evropian, UNHCR dhe Programi për të Drejtat Civile të Kosovës (CRPK), duke ofruar mundësi trajnimi dhe zhvillimi për studentët mbi mbrojtjen e të drejtave të refugjatëve dhe personave pa shtetësi.
Për këtë, përfaqësuesit e programit të Klinikës Ligjore “Mbrojtja Ndërkombëtare – Azili, Refugjatët dhe Pashtetësia” kanë qëndruar sot në UKZ, ku fillimisht janë pritur në një takim nga Prof. Asoc. Dr. Shpresa Qamili, Prorektore për Mësim dhe Çështje të Studentëve në Universitetin Publik “Kadri Zeka”.
Prorektorja Qamili falënderoi të pranishmit për realizimin e këtij aktivitet, duke thënë se kjo klinikë është një mundësi e mirë për studentët për të fituar njohuri dhe përvojë praktike në fushën e mbrojtjes së të drejtave të njeriut dhe të refugjatëve.
Pas takimit, u mbajt ceremoninë e mbylljes së Klinikës Ligjore, ku Prof. Ass. Dr. Vaxhid Sadriu, Prodekan i Fakultetit Juridik, në emër të Dekanes së Fakultetit Juridik Prof. Asoc. Dr. Fatmire Krasniqi dhe stafit të këtij Fakulteti, përshëndeti përfaqësues nga UNHCR, UNDCO, CRPK dhe të pranishmit tjerë, duke shpreh mirënjohjen për bashkëpunimin në realizimin e Klinikës Ligjore.
Prodekani Sadriu po ashtu ka falënderuar Rektorin e UKZ-se, Prof. Asoc. Dr. Artan Dërmaku, i cili me udhëheqjen dhe vizionin e tij po punon në vazhdimësi për ngritjen e standardeve akademike të universitetit, standarde që janë në shërbim të dijes dhe suksesit.
Prof. Ass. Dr. Vaxhid Sadriu, ka falënderuar edhe Prorektorin për Bashkëpunim Ndërkombëtar dhe Projekte Prof. Dr. Dukagjin Leka, i cili me kontributin dhe angazhimin e tij ka zhvilluar në të gjitha dimensionet jo vetëm Fakultetin Juridik, por edhe universitetin në tërësi.
Ai ka thënë se do të vazhdojmë të bashkëpunojmë edhe në të ardhmen, sepse duke forcuar vlerat që na bashkojnë, ne do të ndikojmë në ngritjen e profesionalizimit te gjeneratës së re, studentëve, në iniciativat që e lidhin drejtësinë ndërkombëtare me praktikën e studentëve, duke theksuar se kjo është një mundësi për të zhvilluar aftësitë e tyre profesionale dhe për t’u bërë pjesë e zgjidhjes së çështjeve të mëdha ligjore që prekin shoqërinë.
Arjun Shrestha, Shef i Misionit në UNHCR në Kosovë, theksoi rëndësinë e mbrojtjes së të drejtave të refugjatëve dhe azilkërkuesve. Ai gjithashtu vlerësoi angazhimin e Universitetit Publik “Kadri Zeka” dhe studentëve të tij në këtë fushë, për mundësinë që ofron për studentët që të kontribuojnë në trajtimin e këtyre çështjeve.
Jerome Bouyjou, përfaqësues i UNHCHR, foli për të drejtat ndërkombëtare të njeriut dhe rëndësinë e mbrojtjes ligjore për ata që janë në nevojë, duke nënvizuar rolin e profesionistëve të drejtësisë në këtë drejtim.
Pjesëmarrësit studentë ndanë përshtypjet e tyre për programin, duke e vlerësuar si një mundësi të shkëlqyer për të marrë njohuri dhe përvoja praktike, si dhe për të kontribuar në mbrojtjen e të drejtave të njeriut dhe azilkërkuesve.
Ceremonia u përmbyll me ndarjen e certifikatave për studentët që përfunduan me sukses programin, duke i inkurajuar ata të vazhdojnë angazhimin e tyre për të drejtat e njeriut dhe drejtësinë ndërkombëtare.
Ndryshe gjatë zhvillimit të Klinikës Ligjore “Mbrojtja Ndërkombëtare – Azili, Refugjatët dhe Pashtetësia” , studentët morën pjesë në leksione, simulime praktike ku studentët patën mundësinë të përfshihen në procese ligjore reale dhe diskutime mbi çështje të rëndësishme, si korniza ligjore ndërkombëtare për mbrojtjen e refugjatëve, drejtësia tranzicionale, legjislacioni i BE-së për azilin, si dhe instrumentet ndërkombëtare në fushën e pashtetësisë.
Po ashtu, gjatë programit, u organizuan vizita studimore në Qendrën e Azilit në Magure, ku studentët u njohën me procesin e pranimit dhe trajtimit të azilkërkuesve./GJILANI INFO/
