Qendra Kryesore e Mjekësisë Familjare në Viti, në koridnim me Qendrën Regjionale të Shëndetit Publik në Gjilan (QRSHP) dhe Drejtorinë e Arsimit në Viti, kanë shënuar sot “Ditën Botërore të Zemrës”.
Aktiviteti për këtë ngjarje ka nisur në qendër të qytetit, aty ku edhe qytetarët patën mundësinë për të matur tensionin arterial, glikeminë, po edhe të marrin këshilla nga Dr. Elver Sinani, internist në QKMF dhe Dr.Festona Qamili.
Ndërkaq, infermieret kanë shpërndarë e fletushka me informacione për shëndetin e zemrës.
Ky aktivitet ka vazhduar edhe nëpër shkollat e komunës së Vitisë ku edhe janë mbajtur nga një orë mësimore prej arsimtarëve të lëndës së Biologjisë dhe Edukatës Qytetare për sëmundjet e zemrës dhe trajtimet e tyre.
Liigjërata me karakter të edukimit shëndetsor lidhur me sëmundjes së zemrës dhe trajtimin e atyre sëmundjeve janë mbajtur në Shkollën Fillore ”Bafti Haxhiu”, pastaj në Sllatinë të Poshtme, Remnik, Stubëll, Vërban, Gushicë, Skifteraj, Sllatinë e Epërme( 4 shkollat) etj.
Shënimi i Ditës Botërore e Zemrës kishte për qëllim kryesor: informimin, edukimin dhe ndërgjegjësimin lidhur me sëmundjet kardiovaskulare, të cilat janë shkaku kryesor i vdekjeve në gjithë botën.
Kurse, aktivitetet përkitazi për këtë ngjarje kishin për synimin promovimin e masave parandaluese për të zvogëluar rrezikun nga sëmundjet kardiovaskulare.
Siç dihet, sëmundjet e zemrēs shkaktohen nga kombinimi i një sërë faktoresh si: Presioni i lartë i gjakut, kolesteroli i lartë, mbipesha dhe obeziteti dhe diabeti.
Shkaktar të sëmundjes së zemrës gjithashtu mund të jenë edhe faktorët e mënyrës së jetesës, si: dieta jo e shëndetshme, duhanpirja, mungesa e aktivitetit fizik si dhe konsumimi i madh i alkoolit. /GJILANI.INFO/
