Rexhep Hoti është autor i një vepre tjetër letrare. “Kohë e prerë” është romani i tij i ri, i cili është pajisur me një parathënie nga Helena Kadare, kurse një shënim të shkurtër për të ka shkruar edhe shkrimtari Ismail Kadare, tashmë i ndjerë.
“Romani i Rexhep Hotit ‘Kohë e prerë’ është shkruar me kulturë dhe një fill, i cili përshkruan një nga formatet më të lartë të letërsisë. Tonet autobiografike janë një tjetër pasuri gjuhësore dhe historike e këtij romani. Rexhep Hoti i përket një brezi iluministësh, që i kanë dhënë aq shumë Kosovës e për të cilët Kosova do të ketë gjithmonë nevojë”, është shënimi i shkrimtarit Ismail Kadare në kapakun e pasmë të librit të Hotit.
Ndërkaq Helena Kadare në parathënien për këtë roman, ndër të tjera, shkruan: “Duke lexuar romanin e Rexhepit do të endesha në një kronikë të shkruar plot kulturë e stil, me një poetikë të natyrshme për një prozator që vjen nga poezi, që të bënte të jetoje atë që është aq me vlerë në një vepër: kënaqësia e leximit dhe kodi i saj suprem. Duke e sjellë si një personazh letrar, ai i jep Ukshinit me këtë libër një tjetër jetë që është jeta që të jep letërsia artistike…”.
