Akil Gjakova ka fituar Medaljen e Artë në Kampionatin Evropian të Hapur të xhudos në Prishtinë.
Xhudisti kosovar ka arritur ta mposhtë italianin, Manuel Lombardo. Kjo ishte medalja e katërt e Kosovës në garat e organizuara në Prishtinë, por e vetmja e artë.
Paraprakisht Dardan Cena, Nora Gjakova e Distria Krasniqi kanë fituar medaljet e bronzta.
Medaljen e artë për xhudistin Akil Gjakova e ka ndarë kryeministri i vendit, Albin Kurti. Pjesë e këtij aktiviteti ka qenë edhe presidentja Vjosa Osmani, e cila ka ndarë medaljet për xhudistet, teksa të pranishëm kanë qenë edhe ministra të kabinetit qeveritar, ambasadori amerikan, Jefrrey Hovenier dhe ambasadorë tjerë të akredituar në vendin tonë si dhe liderë të partive opozitare.
Do theksuar se krahas medaljes së artë Akil Gjakova është shpërblyer me çekun në vlerë 55 mijë euro. Për medaljet e argjenda garuesit janë shpërblyer nga Federata Evropiane e Xhudos me nga 35 mijë euro, derisa për medaljet e bronzta me nga 20 mijë euro.
Kosova merr Medaljen e tretë radhazi, fiton Distria Krasniqi
Kosova ka arritur ta marrë edhe Medaljen e tretë radhazi në Kampionatin Evropian të Hapur të xhudos në Prishtinë.
Pas Dardan Cenës dhe Nora Gjakovës medajlen e bronztë e ka fituar edhe Distria Krasniqi.
Xhudistja kosovare ka fituar kundër garueses sllovene, Kaja Kajzer.
Kosova e ka edhe një garues tjetër që pret të marrë medalje. Është Akil Gjakova që tashmë ka siguruar finalen.
Pas Cenës edhe Nora Gjakova e fiton Medaljen e bronztë
Nora Gjakova ka arritur ta fitojë Medaljen e bronztë për Kosovën në Kampionatin Evropian të Hapur të xhudos në Prishtinë.
Ajo ka fituar ndaj xhudistes franceze, Priscilla Gneto.
Kjo është medalja e dytë deri më tash për Kosovën. Paraprakisht një të bronztë e ka fituar edhe Dardan Cena.
Dardan Cena fiton medaljen e bronztë
Dardan Cena ka arritur ta fitojë Medaljen e bronztë për Kosovën në Kampionatin Evropian të Hapur të xhudos në Prishtinë.
Gjithashtu medalja e tij është edhe medalja e parë për Kosovën nga kampionati i organizuar në Prishtinë.
Kosovari ka triumfuar në përballje me garuesin moldav, Petru Pelivan.
Shkëlqen Akil Gjakova, kalon në finale
Akil Gjakova ka realizuar një fitore të madhe në Evropianin e Hapur të xhudos në Prishtinë.
Ai në meçin gjysmëfinal e ka mposhtur xhudistin moldav, Petru Pelivan, me një hedhje të shkëlqyeshme, duke u kualifikuar në finalen e kësaj gare.
Kjo fitore e ka bërë Akilit të jetë tejet i emocionuar, për faktin se kjo ishte fitorja e parë ndaj këtij kundërshtari në përballjet e deritanishme në karrierë.
Nora Gjakova e Distria Krasniqi mposhten në gjysmëfinale
Nora Gjakova dhe Distrika Krasniqi nuk kanë arritur të kalojnë në finale të Evropianit të Hapur në Prishtinë. Ato janë mundur në gjysmëfinale nga kundërshtaret e tyre nga Gjeorgjia, përkatësisht Izraeli. Nora pësoi humbje nga Eteri Liparteliani e Gjeorgjisë, me Ippon, derisa Distria pësoi nga xhudistja izraelite, Timna Nelson Levy në kohën shtesë me Wazzari. Ato tashmë do të jenë të detyruara të luftojnë përmes repasazhit për medaljen e bronztë.
Cena ndalet në çerekfinale
Dardan Cena nuk ka arritur gjysmëfinalen e Evropianit të Hapur në Prishtinë.
Ai është mposhtur nga italiani Lombardo.
Megjithatë kosovari do të jetë në repasazh. Ai mund të fitojë medaljen e bronztë.
Akil Gjakova në gjysmëfinale
Akil Gjakova ka arritur në gjysmëfinale të Evropianit të Hapur në Prishtinë.
Ai ka fituar fituar kundër kundërshtarit më të vështirë, Heydarov nga Azerbajxhani.
Gjakova është i treti gjysmëfinalist nga Kosova. Mbetet të shihet nëse edhe Dardan Cena do të arrijë që ta prekë gjysmëfinalen.
Edhe Distria Krasniqi në gjysmëfinale
Pas Nora Gjokës edhe Distria Krasniqi ka realizuar fitore në Evropianin e Hapur në Prishtinë.
Ajo në çerekfinale ka fituar nga garuesja bullgare, Ilieva Ivelina.
Tash Krasniqi do të luajë në gjysmëfinale.
Nora Gjakova arrin në gjysmëfinale
Kampionia olimpike Nora Gjakova ka kaluar në gjysmëfinale të Kampionatit Evropian të hapur të xhudos që po mbahet në Prishtinë.
Nora në çerekfinale e ka mposhtur sllovenen Kaja Kajzer. Deri te fitorja Nora Gjakova arriti me “Wazzari” në kohën shtesë.
Xhudistët kosovarë kalojnë me sukses edhe luftërat e dyta
Xhudistët kosovarë kanë vazhduar paraqitjen e tyre të suksesshme në Kampionatin Evropian të hapur në Prishtinë. Dardan Cena ka shënuar fitore të madhe në xhiron e dytë, duke e mposhtur gjermanin Igor Wandtke.
Ai deri te fitorja erdhi me Ippon në kohën shtesë pas një lufte tejet interesante dhe të fortë. Me mjaft vështirësi luftën e dytë e ka kaluar edhe Akil Gjakova, i cili ia doli të mposhtë austriakun Lukas Reiter pas tetë minutave luftë të fortë.
Ndërkohë, Nora Gjakova e ka kaluar me sukses luftën e parë, duke e mposhtur finlandezen Pihla Matikainen, teksa në çerekfinale do të përballet me sllovenen Kaja Kajzer.
Garat e këtij kampionati po transmetohen ekskluzivisht në RTK 1.
Gjakova e Cena e nisin me fitore Evropianin në Prishtinë
Akil Gjakova e ka nisur me fitore paraqitjen në Kampionatin Evropian të hapur të xhudos që po mbahet për herë të parë në Kosovë. Ai ka fituar kundër xhudistit kroat Robert Klaçar.
Në përballjen deri në kategorinë shtatëdhjetë e tre kilogramë xhudisti kosovar është treguar më i shkathët, duke kaluar në fazën tjetër.
Fitore ka shënuar edhe Dardan Cena, i cili e ka mposhtur finlandezin Valtteri Olin.
Sot në RTK, maratona e xhudos
Për herë të parë në histori, Kosova do të jetë nikoqir i Kampionatit Evropian të hapur të xhudos. Pallati i Rinisë dhe Sportit në kryeqytet sot do të jetë arenë e xhudistëve më të mirë evropianë, teksa Radiotelevizioni i Kosovës do të ketë transmetim ekskluziv dhe maratonik të kësaj ngjarje.
Në orën 10:30 do të nisin garat e raundin preliminar, derisa nga ora 17:30 deri në orën 19:00 do të jetë blloku final.
Dje është hedhur shorti i kësaj gare, ku dy kampionet tona olimpike, Distria Krasniqi dhe Nora Gjakova, që garojnë në kategorinë -57 kg, mund të përballen mes vete vetëm nëse kualifikohen në finale, natyrisht nëse kalojnë pengesat e mëdha në çerekfinale dhe gjysmëfinale.
Në kategorinë e meshkujve (-57 kg), short më i vështirë është për Akil Gjakovën dhe Dardan Cenën, të cilët për të hyrë në zonën e medaljeve, mund të përballen me medalistë botërorë e olimpikë.
Kampionati i hapur evropian i xhudos vjen nën komentimin e Arben Berishës dhe Artan Muhaxhirit.
