Në kryeqytetin e Kosovës, mbeturinat vazhdojnë të mbeten të pa mbledhura për shkak të grevës së punëtorëve të KRM “Pastrimi” në Prishtinë, të cilët po kërkojnë rritje pagash, por që ende kanë ngelur pa përgjigjie.
Drejtor Ekzekutiv në KRM Eco-Higjiena në Gjilan, Senad Ramaj ka thënë se bashkëndjenë me situatën e krijuar atje, si dhe ka uruar që ky problem të zgjidhjet sa më shpejtë.
Nga ana tjetër, ka theksuar se për fat të mirë në komunat e Anamoravës ku operon kjo kompani, nuk ka probleme të natyrës së tillë.
“Fokusi i kompanisë Eco – Higjiena është në ofrimin e shërbimeve sa më cilësore për qytetarë/klientelën”, ka nënvizuar, ai.
Drejtori Ramaj tha se janë të angazhuar që të ketë edhe inkasim efikas, gjë kjo e cila mundëson shërbime cilësore dhe krijon gjendje stabile financiare të kompanisë, me synim që t’iu shmangen problemeve të tilla si në kryeqendër.
Ai ka thënë se me aprovimin e tarifës së re nga kuvendi i aksionarëve, kompania Eco-Higjiena ka bërë edhe ngritjen e pagave për 60 punëtorët e grumbullimit të mbeturinave si dhe 50 punëtorët në sektorë tjerë.
Drejtori Ramaj pohon se po punohet që të ofrohen kushte sa më të mira për punëtorët duke shtuar se kamionët janë të paisur me mekanizmin e zbrazjes, kështu që atyre iu mundësohet puna më e lehtë gjatë procesit të grumbullimit të mbeturinave.
Sipas tij, tani për sezonë janë duke u përgatitur që punëtorët të pajisjen edhe me veshmbathjen e duhur për punë.
Për të ofruar shërbime sa më të mira, për kategoritë që i mbulon me shërbime kjo kompani(amvisëria/bizneset/institucionet komunale/), Senad Ramaj, Drejtor Ekzekutiv në KRM Eco-Higjiena, fton secilin klientë me obligime ndaj kompanisë, të paraqitet në zyrat e KRM Eco-Higjiena, apo te inkasantët dhe t’i shlyejnë ato, sepse vetëm pagesat që kryhen rregullisht dhe në kohë, garantojnë një shërbim cilësor dhe bashkëkohor.
“Po ashtu duke qenë të rregullt në pagesa, kompania nuk do të ketë nevojë për të ndërmarrë veprime tjera ligjore për të inkasuar borxhet, e klientët do t’u shmangen shpenzimeve tjera të panevojshme”, ka theksuar drejtori Ramaj.
Ai ka bërë me dije se rastet sociale nuk faturohen, ndërkohë që ka edhe një apel për institucionet përkatëse që të përkujdesen për të ndëshkuar kushdo që degradon ambientet publike.
“Sa për sqarim, sipas kontratës kompania operon me shërbime për amvisëri, biznese dhe institucione komunale, por është e hapur për bashkëpunimi, për projekte të përbashkëta me institucione të tjera vendore e ndërkombëtare”, ka thënë Drejtori Ramaj./GJILANI INFO/
