Me iniciativën e udhëheqësit të Zyrës për të Drejtat e Njeriut e Komunitetit, Ardian Foniqi janë nënshkruar dy marrëveshje bashkëpunimi në mes të OJQ “Down Syndrom Kosova” në Gjilan me donatorët, Kompania e ujit “Dea” dhe ajo e ndërtimit të banesave “Xhevda MAAE”.
“I falënderoj donatorët për mbështetjen që dhanë për këtë kategori të fëmijëve, të cilët deri tani këto shërbime nuk i kanë gëzuar, ndërsa tani e tutje falë këtyre dy donatorëve do t’i kenë”, ka thënë Ardian Foniqi, udhëheqës i Zyrës për të Drejtat e Njeriut dhe Komunitetit në Gjilan.
Sipas tij, kryetari i komunës, Alban Hyseni, është i përkushtuar që të mbështesë këtë OJQ, së cilës kohë më parë i është dhënë në shfrytëzim objektit për t’i zhvilluar aktivitetet ditore me këta 40 fëmijë.
Përndryshe, marrëveshja është nënshkruar nga drejtoresha e “Down Syndrom Kosova” Sebahate Hajdini – Beqiri në njërën anë dhe nga pronari i kompanisë “Xhevda MAAE”, Xhevdet Hajrullahu dhe Kushtrim Avdyli nga kompania “Dea”./GJILANI INFO/
