Në 23 vjetorin e rënies së dëshmorëve të kombit Bafti Haxhiu dhe Sali Zenuni, në varrezat e dëshmorëve në Viti, janë bërë homazhe dhe janë vendosur kurore lulesh në varret e këtyre dy dëshmorëve.
Pos autoriteteve të Institucioneve komunale, në homazhe morën pjesë edhe përfaqësuesit e Policisë, të organizatave të dala nga lufta e UÇK-së, familjet e dëshmorëve, bashkëluftëtarë të dëshmorëve e familjarë të tyre si edhe personeli arsimor dhe nxënësit të shkollës “Bafti Haxhiu” në Viti e Ramnishtë.
Ndërkohë është organizuar një manifestim në Shtëpinë e Kulturës “Gursel e Bajram Sylejmani” në Viti, për shënimin e ditës së Shkollës “Bafti Haxhiu”, ku një fjalë rasti e mbajti zv.kryetari i komunës Hasan Aliu, i cili ndër të tjerash tha se duhet respektuar institucionet dhe nderuar dëshmorët.
Për historikun e shkollës Bafti Haxhiu foli drejtori Afrim Rrustemi, i cili përmendi të arriturat dhe rezultatet e kësaj shkolle. Në shënimin e ditës së shkollës, u lexua edhe biografia e dëshmorit Bafti Haxhiu, kurse në emër të Shoqatave të dala nga lufta foli Avdyl Bajrami.
Me këtë rast, u dha edhe një program i pasur artistik, nga nxënësit e shkollës.
Përndryshe, dëshmorët Bafti Haxhiu e Sali Zenuni, kanë rënë heroikisht me 26 maj të vitit 1999 si pjesëtarë të Ushtrisë Çlirimtare të Kosovës në malet e Gorozhupit të Hasit./GJILANI INFO/
