Kuvendi Komunal i Gjilanit, nën udhëheqjen e Kushtrim Kadriut, kryesues, në seancën e sotme të rregullt, e cila është e dyta për këtë vit, ka miratuar rregulloren dhe planin e ri për transparencë, të cilat i ka arsyetuar drejtoresha për Administratë të Përgjithshme, Arbenita Sopi Haziri, duke theksuar se risia më këtë rast është buxhetimi me pjesëmarrje, që tashmë bëhet obligative për t’u zbatuar nga Komuna e Gjilanit.
Në këtë rast, asambleisti Gentrit Murseli (LDK) tha se e mira është që edhe kjo rregullore tregon hapat se si duhet të miratohet buxheti.
Kuvendi ka miratuar, po ashtu, edhe rregulloren për përdorimin dhe mirëmbajtjen e flamujve në komunën e Gjilanit, sikurse që ka diskutuar edhe rreth organizimit të trafikut urban brenda qytetit të Gjilanit, e cila ishte inicuar nga asambleisti Ismajl Kurteshi (VV), me qëllim të lehtësimit të qytetarëve gjatë lëvizjes brenda qytetit, të cilin e ka mbështetur edhe Nazim Gagica (AAK).
Kuvendarët miratuan edhe propozimin që Drejtoria e Shërbimeve Publike të dalë me një raport në fund të majit në Kuvendit Komunal, për përgatitjet për organizimin e transportit urban.
Në këtë seancë është miratuar edhe kërkesa e shoqatës sindikale të Policisë së Kosovës rajoni i Gjilanit dhe zjarrëfikësit, për lirimin nga pagesa të policëve e zjarrfikësve nga pagesat e shërbimeve të shëndetësisë primare, sikurse edhe kërkesa e OVL UÇK-së në Gjilan për mbështetjen e një veterani për renovimin e shtëpisë, të cilat i arsyetuan Sami Ahmeti (LDK) e Krenare Latifi Kqiku (LVV).
Gjatë ditës, është miratuar edhe iniciativa për bashkëpunim komunal ndërkombëtar të Komunës së Gjilanit me Komunën e Gostivarit.
Ndërkaq, kërkesa e Universitetit Publik “Kadri Zeka” për dhënien në shfrytëzim të pjesës së lokacionit Fshati Social në lagjen Arbëria, njësia kadastrale 01382-01, të cilën e ka inicuar rektori Artan Dërmaku, është shtyrë për një seancë tjetër, me rekomandimin që kryetari i Komunës, në koordinim me grupet politike, të përcaktojnë tri alternativa të lokacioneve brenda dhjetë ditëve, për zhvillimin e këtij Universiteti
Ndryshe, raporti i suksesit të nxënësve për gjysmëvjetorin e parë të vitit shkollor 2024-2025 dhe informata rreth manifestimit “Flaka e Janarit 2024” janë shtyrë për një seancë tjetër.
