Ka ndërruar jetë Nijazi Ramadani, shkrimtar gjilanas, botoi libra me poezi, prozë, roman e dramë, ishte njohës i mirë i teatrit, i dalluar me kritikën e tij në këtë fushë. Po ashtu i vlerësuar edhe në fushën publicistike e gazetareske. Një pjesë të jetës së tij ia kushtoi edhe fushës së arsimit ku punoi si mësimdhënës. (së fundi punoi në shkollën “Mulla Idris Gjilani”, Velekincë, Gjilan).
Nijazi Ramadani lindi më 14 shkurt 1964 në Kokaj të Gjilanit. Arsimin fillor e ndoqi në vendlindje dhe më pas në Pogragjë, ndërsa shkollën e mesme e përfundoi në Gjimnazin “Zenel Hajdini” në drejtimin Matematikë-Teknikë. Studimet universitare i vijoi në Fakultetin e Edukimit të Universitetit të Prishtinës, ku u diplomua në programin Matematikë–Informatikë (AKM, Bachelor), me temën “Teorema e Talesit”.
Ramadani ishte aktiv në shumë fusha, dhe veçojmë edhe atë të drejtimit të Shtëpisë Botuese “Rrjedha” si dhe editoi revistën “Ushtima e maleve”.
Ndërsa sa i përket krijimtarisë së tij letrare, përfshirë këtu poezinë, prozën, dramën e romanin, por edhe studimet e tija dhe kritikën letrare e të teatrit, por edhe të artit pamor, kujtojmë se ai, për punën e tij në këtë fushë u vlerësuar edhe me çmime të ndryshme brenda e jashtë Kosovës.
Pra, ai gjatë angazhimit të tij të palodhshëm, ka botuar poashtu recensione, vështrime, artikuj, ese, trajtesa e shkrime të angazhuara hulumtuese në revista e ndryshme shqiptare dhe jashtë vendit, duke trajtuar në to çështje të ndryshme sociale, kulturore, e të krijimtarisë letrare në përgjithësi. Disa punime e tij janë përkthyer në gjuhë të tjera. Ndërsa, për veprat e tija kanë shkruar shumë autorë në mediume të shumta.
Me shkuarjen e tij në amshim, Gjilani, por edhe Kosova ka humbur një penë të mprehtë të letrave shqipe që do t’i jepte edhe më shumë krijimtarisë së gjithmbarshme shqiptare.
