Arben Dubova
Projekti i Bulevardit të Qytetit të Gjilanit i cili sipas informacioneve zyrtare nga komuna e Gjilanit do të ketë kosto 18 milion €, pa u lëshuar në aspektin teknik dhe funksional sepse nuk jam i fushës dhe nuk mund të jap vlerësime të tilla, por në aspektin ekonomik/financiarë pa dyshim se do te ketë impakt të madh ekonomik në ekonominë e Gjilanit.
Nga një kalkulim sipërfaqësor me një marzhë mesatare të fitimit prej 20% të të gjithë operatorëve që do të angazhohen në këtë projekt qoftë si kontraktor direkt apo si nënkontraktor na del një fitim i realizuar prej 3.6 milion €.
Nëse e marrim parasysh edhe efektin e multiplikatorit (nxitjes së qarkullimit edhe të bizneset tjera që preken indirekt nga ky projekt), atëherë marzha e fitimit do të shpërndahet tutje dhe fitimi i realizuar i bizneseve do të shënojë rritje në shtrirje më të thellë, krejt kjo si rrjedhojë e investimeve të shtetit në infrastrukturë publike!
Projekte të tilla me vlera të larta financiare janë infuzion i fuqishëm për ekonominë e cila përkthehet në paga më të larta, vende të reja pune dhe te hyra buxhetore më të mëdha!
Pra, impakti i projektit Bulevardi i Qytetit të Gjilanit shprehur në terma financiare nënkupton fuqizim të bizneseve të qytetit tonë dhe mirëqenie ekonomike më të mirë për të punësuarit në sektorin privat si dhe gjithashtu të hyra buxhetore më të larta për vet shtetin.
Projekte të tilla serioze i duhen Gjilanit sikur ky qe u inaugurua fillimi i tije, sikur ai i stadiumit të qytetit, impianti i ujërave të zeza e projekte tjera infrastrukturore! /GJILANI INFO/
