Kryetari i komunës së Vitisë, Sokol Haliti, ka pritur sot në një takim pune, Kryeshefin Ekzekutiv të Kompanisë Regjionale të Ujërave “Hidromorava”, në Gjilan, Abdylaziz Selmani, dhe Kemur Mustafa, Përgjegjës i Kompanisë Rajonale të Ujësjellësit “Hidromorava”-Dega në Viti.
Temë bisede e këtij takimi ishte zgjidhja e problemeve të ujësjellësit nëpër disa lokalitete, shtimi i kapaciteteve të furnizimit të rregulltë me ujë të pijshëm i qytetarëve të komunës së Vitisë, menaxhimi i ujësjellësit në të gjitha lokalitetet, si dhe implementimi i projektit të BERZH-it.
“Komuna e Vitisë ka kryer shumë punë për të përmbushur obligimet e veta. Është koha që sa më parë të shtohet kapaciteti i furnizimit me ujë dhe që qytetarët të kenë ujë të pijshëm në shtëpitë e tyre”, u shpreh kryetari Haliti.
Gjatë këtij takimi Kryetari Haliti është interesuar edhe rreth sigurimit të ujit të pijshëm në të gjitha lokalitetet e komunës së Vitisë, në veçanti në fshatrat ku është punuar në rrjetin e ujësjellësit por që akoma nuk janë funksionalizuar dhe nuk janë në menaxhim të kompanisë së ujërave.
Ndërsa kryeshefi ekzekutiv i KRU “Hidromorava”, Abdylaziz Selmani, ka falënderuar kryetarin Haliti për pritjen dhe bashkëpunimin, duke besuar se ky bashkëpunim do të shtohet edhe më shumë në të mirë të qytetarëve./Gjilani.info/
