Kosova do të përfshihet sot nga mot i ndryshueshëm, me periudha me diell dhe shtim të vranësirave gjatë ditës. Sipas parashikimeve meteorologjike, në disa zona priten rrebeshe lokale shiu, të shoqëruara me shkarkesa rrufesh dhe, vende-vende, me breshër të imët.
Meteorologët paralajmërojnë se në rajone të caktuara vranësirat mund të jenë më intensive, duke krijuar kushte për vërshime të shpejta lokale për shkak të reshjeve të dendura dhe lëvizjes së ngadalshme të masave ajrore.
Era do të fryjë kryesisht nga veriu me shpejtësi prej 20 deri në 60 kilometra në orë, ndërsa në zonat ku zhvillohen stuhi lokale mund të ketë edhe goditje më të forta të erës.
Temperaturat minimale do të sillen nga 16 deri në 18 gradë Celsius, ndërsa ato maksimale do të arrijnë nga 27 deri në 30 gradë. Gjatë reshjeve dhe stuhive lokale, temperaturat pritet të bien ndjeshëm, në disa raste deri në 10 gradë më pak se vlerat maksimale të ditës.
Qytetarët këshillohen të jenë të kujdesshëm gjatë lëvizjes në zonat ku mund të ketë reshje intensive, rrufe dhe erëra të forta./Gjilani INFO/
