Me rastin e përvjetorit të rënies heroike të dëshmorit të kombit, Kemajl Azizi, sot në Viti janë zhvilluar homazhe përkujtimore në nderim të jetës dhe sakrificës së tij për lirinë e vendit.
Në varrezat e dëshmorëve, kryetari i Komunës së Vitisë, Sokol Haliti, së bashku me bashkëpunëtorët e tij, ka vendosur kurora me lule pranë varrit të dëshmorit, duke shprehur respekt dhe mirënjohje për kontributin e tij.
Në ceremoninë përkujtimore morën pjesë edhe përfaqësues të organizatave të dala nga lufta e Ushtrisë Çlirimtare të Kosovës, përfaqësues të institucioneve komunale, subjekteve politike, Policisë së Kosovës, qytetarë të shumtë si dhe familjarë të dëshmorit.
Të pranishmit nderuan me respekt figurën e Kemajl Azizit, duke kujtuar sakrificën e tij në rrugën drejt lirisë dhe pavarësisë së Kosovës. Homazhet u zhvilluan në atmosferë respekti dhe mirënjohjeje për të gjithë dëshmorët që dhanë jetën për atdheun./Gjilani INFO/
