Pas më shumë se katër dekadash të përkushtuara në edukimin dhe formimin e brezave të rinj, profesori i Edukatës Fizike, Rabit Matoshi, është pensionuar, duke mbyllur një kapitull të rëndësishëm të jetës së tij profesionale në shërbim të arsimit.
Me rastin e pensionimit, kolektivi i Shkollës Fillore të Mesme të Ulët “Rexhep Elmazi” në Gjilan ka organizuar një ceremoni simbolike, ku ka shprehur mirënjohje dhe respekt për kontributin e profesorit Matoshi gjatë viteve të punës së tij.
Të pranishmit vlerësuan lart angazhimin, profesionalizmin dhe përkushtimin që ai ka dëshmuar përgjatë karrierës, duke e cilësuar si një pedagog të respektuar dhe një figurë të rëndësishme në komunitetin arsimor.
Gjatë më shumë se 40 viteve në arsim, Rabit Matoshi ka edukuar dhe frymëzuar gjenerata të tëra nxënësish, duke lënë gjurmë të pashlyeshme në jetën e shumë të rinjve që sot janë të suksesshëm në fusha të ndryshme brenda dhe jashtë vendit.
Në fjalët e tyre, kolegët theksuan se profesori Matoshi do të mbahet mend jo vetëm për profesionalizmin e tij, por edhe për vlerat njerëzore, korrektësinë dhe bashkëpunimin e vazhdueshëm me stafin dhe nxënësit.
Në fund, kolektivi i shkollës i uroi atij pensionim të mbarë, shëndet të mirë, lumturi dhe vite të qeta pranë familjes, duke e falënderuar për kontributin e jashtëzakonshëm që ka dhënë në arsim ndër vite../Gjilani INFO/
