Komuna e Kamenicës ka nisur një aksion gjithëpërfshirës për përmirësimin e gjendjes së mjedisit jetësor, duke adresuar një nga sfidat më të mëdha me të cilat përballen qytetarët – ndotjen e mjedisit.Ndotja, e cila shfaqet në forma të ndryshme si ndotja e tokës, ajrit dhe ujit, vazhdon të jetë një problem shqetësues edhe në nivel lokal. Një ndër çështjet më të theksuara mbetet hedhja ilegale e mbeturinave në hapësira të papërshtatshme, duke rrezikuar shëndetin e qytetarëve dhe duke dëmtuar ekosistemin, përfshirë botën bimore dhe shtazore.
Me qëllim të përmirësimit të kësaj gjendjeje dhe rritjes së vetëdijesimit qytetar, Drejtoria për Shërbime Publike, Ambient, Inspektorat dhe Emergjenca, ka organizuar këtë aksion i cili ka filluar sot më 22 prill.
Aksioni përfshin pastrimin e hapësirave publike dhe deponive ilegale, si dhe mbjelljen e drunjve dekorativë, duke kontribuar kështu në krijimin e një ambienti më të pastër dhe më të shëndetshëm për të gjithë qytetarët.Përmes këtij aksioni synohet rritja e vetëdijesimit të qytetarëve për rëndësinë e ruajtjes së mjedisit, inkurajimi i iniciativave qytetare në fushën e ambientit, si dhe parandalimi i veprimeve të dëmshme mjedisore.
Komuna e Kamenicës u bën thirrje të gjithë qytetarëve që të kontribuojnë në ruajtjen e mjedisit dhe të bëhen pjesë aktive e kësaj nisme, për një të ardhme më të pastër dhe më të shëndetshme për të gjithë./Gjilani INFO/
