Drejtori i Arsimit, Jeton Rexhepi, priti në takim drejtorin Policisë në Bashkësi dhe Parandalim (DPP) në Prishtinë, major Ramadan Ahmeti, si dhe koordinatorin për Komunitet dhe Parandalim në Drejtorinë Rajonale të Policisë në Gjilan, toger Fatos Latifi.
Gjatë takimit, major Ahmeti prezantoi projektin “Nga errësira në dritë”.
Ky projekt, do të realizohet në bashkëpunim ndërmjet DPP-së dhe DKA-së në Gjilan dhe synon ngritjen e vetëdijesimit tek të rinjtë për dukuritë negative në shoqëri, me theks të veçantë në parandalimin e përdorimit të drogave.
Njëkohësisht, projekti promovon mendimin kritik dhe nxit zgjedhje të shëndetshme përmes artit dhe bashkëpunimit të drejtpërdrejtë me policinë.
Në kuadër të këtij projekti, nxënësit do të angazhohen në krijimin e punimeve artistike, duke realizuar piktura, dizajne në tekstil dhe forma të tjera kreative, duke përdorur materiale të ndryshme që aplikohen në shkollë.
Zbatimi i projektit është planifikuar të zhvillohet gjatë muajve prill dhe maj 2026, në Shkollën e Mesme të Arteve Pamore “Adem Kastrati” në Gjilan./Gjilani INFO/
