Në Ministrinë e Arsimit dhe Shkencës u organizua tryezë e përbashkët me të gjitha Universitetet vendore me temën “E ardhmja e statusit të Programit Erasmus+ në Kosovë”
Gjatë takimit u diskutuan zhvillimet aktuale në kuadër të Erasmus+, me theks të veçantë në zbatimin e International Credit Mobility (ICM), rolin e Zyrave për Bashkëpunim Ndërkombëtar, si dhe sfidat dhe mundësitë për të ardhmen, përfshirë procesin e kalimit të Kosovës nga vend partner në Program Country me të drejta të plota.
Në këtë aktivitet, përfaqësues nga Ministria e Arsimit dhe Shkencës prezantuan hapat dhe zhvillimet institucionale drejt këtij objektivi strategjik, ndërsa u theksua rëndësia e përgatitjes së institucioneve të arsimit të lartë për këtë tranzicion.
Nga Universiteti Publik “Kadri Zeka”, U.D. udhëheqësi i Zyrës për Bashkëpunim Ndërkombëtar dhe Anëtarësime, Betim Berisha, prezantoi progresin e universitetit në drejtim të digjitalizimit të proceseve të mobilitetit për staf dhe studentë, duke e pozicionuar UKZ si një nga institucionet e para në Kosovë që po avancon drejt implementimit të plotë të proceseve digjitale dhe njohjes automatike të kredive dhe aplikimit të EWP.
Pjesëmarrja në këtë tryezë konfirmon angazhimin e vazhdueshëm të UKZ për të qenë pjesë aktive e zhvillimeve evropiane në arsimin e lartë, duke kontribuar në rritjen e cilësisë, ndërkombëtarizimit dhe modernizimit të proceseve akademike./Gjilani INFO/
