Kryetari i Komunës së Vitisë, Sokol Haliti, së bashku me drejtorin për Shëndetësi, Halil Musliu, dhe drejtoreshën e QKMF-së, Vjollca Kadolli-Halili dhe të tjerë, kanë pritur sot në takim infermieren Magbule Islami, me rastin e pensionimit të saj pas 38 vitesh pune në shërbim të qytetarëve.
Gjatë këtij takimi u vlerësua lart kontributi i saj shumëvjeçar në sektorin e shëndetësisë, ku ajo ka shërbyer me përkushtim ndaj pacientëve dhe profesionit të saj, duke lënë gjurmë të rëndësishme në Qendrën Kryesore të Mjekësisë Familjare në Viti.
Kryetari Haliti e falënderoj znj. Islami për angazhimin e saj ndër vite, duke theksuar se puna e saj me pacientët ka qenë shembull i përkushtimit dhe humanizmit për gjeneratat që vijnë.
Fjalë miradie në këtë rast shprehën edhe drejtori për Shëndetësi, Halil Musliu, si dhe drejtoresha e QKMF-së, Vjollca Kadolli-Halili, të cilët vlerësuan profesionalizmin dhe kontributin e saj në shërbimin shëndetësor lokal.
Nga ana e saj, znj. Islami falënderoj të pranishmit për respektin dhe vlerësimin e treguar gjatë këtij rasti.
Në fund të takimit, kryetari Haliti i ndau znj. Magbule Islami një mirënjohje për kontributin e dhënë ndër vite, duke i uruar një pensionim të mbarë dhe me shëndet./Gjilani INFO/
