Inspektorët komunalë në Gjilan po intensifikojnë aktivitetet për zbatimin e ligjit dhe vendosjen e rendit në territorin e komunës.
Gjatë aksioneve të fundit, janë ndalur punimet dhe janë rrënuar disa objekte që po ndërtoheshin pa leje ndërtimore në pjesë të ndryshme të qytetit.
Nga Drejtorati për Inspekcion bëhet e ditur se pronarët e këtyre objekteve kishin marrë paraprakisht vërejtje për ndërprerjen e punimeve dhe obligimin për pajisje me leje përkatëse. Megjithatë, mosrespektimi i këtyre udhëzimeve ka çuar në ndërhyrjen e inspektorëve në terren.
“Pavarësisht paralajmërimeve të vazhdueshme, disa qytetarë kanë vijuar punimet pa leje, duke detyruar inspektorët të ndërmarrin masa konkrete, përfshirë ndalimin dhe rrënimin e objekteve”, thuhet në njoftim.
Autoritetet komunale apelojnë te qytetarët që të respektojnë procedurat ligjore dhe të mos ndërmarrin punime ndërtimore pa lejen e organeve kompetente.
Në të kundërtën, Drejtorati për Inspekcion paralajmëron se do të vazhdojë me masa të rrepta, përfshirë rrënime dhe ndjekje ligjore ndaj të gjithë atyre që shkelin ligjin./Gjilani INFO/
